Matthew 21

Iesu Mu'unalai ne Ielusalemu

(Mak 11:1-11; Luk 19:28-38; Ioa 12:12-19)

1Ioxe ilo'a mimuamua'i xe mixali 'alai ne Ielusalemu, la mixali no tuala ne Vetepaxe no laxa'ilu ne Olivu, la Iesu mupalusi'a ta molomolo noxou ta tamei. 2La muvikalane'i ilou lexe, “Ngongou ngalai no tuala vile a no laxungengi ne, la ngamaisie donki neni'a vile a misakii ne itutulu ia 'ilie a ututulu no pa'umele. La sou ngalulusi'a ilou la ngano'a ine'e noxilo. 3Ia lexe ngalulusi'a ia evile utali'isingexa'a la, ngavikalanu lexe Tila mumasaxai'a. La anu upalusinge ngalivu une'e alaxu vilesisi.” 4Mii ane uxali aloxo ne sou umomomo sou vaikala e ta mitema sou palomatana milemolu tei. 5 ^aVaivaikala ne muvikala aloxo 'o,

“Ngavikalane'i ta mitema ne Ielusalemu lexe,
‘Ngamaisou tatananu tuala noxinge anu a unene'e noxinge.
Mo ngamaisou anu mutaloxolixu ualasou xe mutalupexa no anu donki 'ilie
latasou mo anu a uxali 'o.’”
6Ioxe ta molomolo noxou ne milai la mi'oxonu aloxo anu mupela'a ilou ne. 7Ilou mino'a donki ilee 'ilie milai mixalixa'a noxou Iesu mukalu la sou mino'u 'ala'alasou vasime'a ilou sou milalanu no latanu donki ane maulu ne sou Iesu mutelo mutalupexa no anu. 8Xe ta mitema tavu'alo kalumo mixexeenu 'ala'alasou vasime'a no ale ka misia'u no vote'i, xe se'i milai mixola'u ovu avoavolu la mita'olunu no vote'i kalumo. 9 ^bTa mitema ane miulaxu Iesu xe ane'i ane mimulimulinu ili'i no tumalou ne mi'ava aloxo 'o.

“Ta 'osasou, Deviti 'Olu.”
“Lataua ualusou anu ane mune'e no anu xavi noxou IAUE.”
“Ta itinu Lataua ualasou mo ane'i i'itinu ualasine teitexi no opo loxotolo.”
10Iesu mune'e xe mu'unalai ne Ielusalemu la, ta mitema tavu'alo no tuala tila ne mikuluke manina, la mitali'isi'a ngatongato'o lexe, “Itema 'ena'ei manina ne?” 11La sou ane'i ta mitema tavu'alo ne mivikalane'i lexe, “Iesu anu itema sou palomatana sie Naseleti no xalee lia tila ne Xalilaia.”

Iesu Mukusai'a ta Mitema no Nano no Taasou Lalotu Tatila Noxou Lataua

(Mak 11:15-19; Luk 19:45-48; Ioa 2:13-22)

12Iesu mu'unalai no nano no taasou lalotu tatila noxou Lataua, la mukusai'a ta mitema e mita'ota'olunu mimii sou ta mitema ilotonu mo ane'i ane mine'e sou ilotoloto no nano ne milailai no ale. Muvuluvexanu valovaloxa'a ta mitema ane ilavusou ivalavala lamoli no anu. Xe muvuluvexanu luuluusi'a ane'i ane mita'olune'i ta kuau sou ilotone'i. 13 ^cXe muavuti la muvikalane'i aloxo 'o, “Vaikala mikaukavunu muxolu no anu Lavuku Tavuna teinu muvikala aloxo 'o. ‘Taasilo ne ilemolu lexe taasou lakilaka,’ ia ngingi ngexiunu mole muxali loxo taasi'a ta mitema sou pakali sou italume no anu.” 14Xe ta mitema e ie'i seleveenu mo ane'i ane imuamua'i uasi mine'e noxou Iesu sou Anu mupamauline'i no nano no vimeluxu tani tila noxou Lataua. 15Ia ta tatila noxi'a ta aili'i ilo'a ta mitema sou lapuloto mimaisou sosovo ane anu mu'oxonu ne anu iou vilemo. Xe milomusi'a ta molomolo no nano no 'a taasou lalotu tatila noxou Lataua ne mi'ava lexe, “Ta'osasou Deviti 'Olu.” La ane'i la'iaxa'a. 16 ^dXe miavuti la mitali'isou Iesu lexe, “Male nini nelomusou mii ma'ia e ta molomolo 'o milemolu 'o?” La Iesu mukoline'i aloxo 'o, “Ani eni elomusou. Ia loxovaa male ngingi ngaitisou vaikala ane ne muai no anu Lavuku Tavuna uasi?” Muvikala aloxo 'o, “Male nini nelomusou mii ma'ia e, ‘Lataua mulalaxiinu mulaa no anaxa'a ta molomolo xe ta keakea 'o i'itinu ualasou.’” 17Iesu muvikalane'i aloxo ne mukalu la mu'italone'i mixoxolu ne la mulaa no tuala tila ne sou mulai muxolu ne Vetania no 'olovoxo ne.

Ovu Lovo Muxalo

(Mak 11:12-14, 20-24)

18Ilo'a milai miai xe no kakau la milivu milai ne Ielusalemu la, Iesu musolixu. 19Xe iou mulai la mutukumusou ovu lovo vile ne mutulu no vote'i paumolu. La sou mulutu mulai no anu sou ukamuli lexe temanu se'i 'a no anu, la mumaisou lexe ovu ne volovoloxusi ia unene'a uasi. La sou muvikalanu ovu ne aloxo 'o, “Usoko vaimomo 'o, umomomo sou nanene'a la uasi.” Xe alaxu vilesisi la ovu ne muxalo. 20Xe ta molomolo noxou mimaisou aloxo ne la tane'ilili. La mitali'isou Iesu lexe, “Loxovaa la sou ovu muxalo alaxu vilesisi 'o?” 21 ^eLa Iesu mukoline'i aloxo 'o, “Eni avikalangengi manina aloxo 'o, lexe ngingi ngamuxamuxaxu tangengi ia xavutalamengi tatamei uasi, la ngingi nga'oxonu mii ma'ia aloxo eni e'oxonu no anu ovu lovo 'o. Ia ane nesi uasi, anu umomomo sou ngavikalanu laxa'ilu vile lexe, ‘Naavuti mo naili'e ulai no luaki, la anu u'oxonu aloxo ne.’ 22 ^fLexe ngingi ngamuxamuxaxu tangengi xe ngakilaka sou mii vile ngemasaxau, la ngingi ngano'usi.”

Ane'i Mitali'isou Iesu Lexe 'Ei Mulosou Xavi ne

(Mak 11:27-33; Luk 20:1-8)

23Ioxe Iesu mu'unalai no nano no anu taasou lalotu tatila noxou Lataua, la mulosie'i ta mitema lavulavu. Xe no mine Anu ulolosie'i ta mitema lavulavu, la ta tatilasi'a ta 'aili'i ilo'a ta tatilasi'a ta Isilaeli mine'e noxou la mitali'isou aloxo 'o, “Nini neno'u xavi ane ne ne'i la sou na'oxo'oxonu mimii ane ne no anu 'o? Xe 'ei molu sou mulosine mo mupelemasaxaneni sou lexe nini na'oxonu xaixai ne?” 24Xe Iesu muavuti la mukoline'i aloxo 'o, “Eni kalumo atali'isingexu tali'i vile, lexe ngingi ngakolinu tali'i ne une'e noxilo, la sou eni avikalangengi no anu. Lexe no anu xavi ma'ia ane eni a'oxonu mimii 'o. 25Xavi ane Ioanesi muxaxai no anu sou mu'ulosi'a ta mitema 'o ne, anu molu ne'i? Anu molu teitexi no opo loxotolo, uasi molu noxi'a ta mitema?” Xe ane'i miavuti la mivikalasou tali'i ne. La mivikalane'i ngatongato'o lexe, “Maasi xe nenge tavikala lexe Anu molu no opo loxotolo la Anu utali'isinge ulivu la lexe, ia loxovaa la sou ngingi ngamuxaxu tangengi noxou ua? 26 ^gXe nenge tavikala lexe molu noxi'a ta mitema, la ane ne umomomo uasi. Nenge ta'ume noxi'a ta mitema, xo ta mitema latala ne milavusi lexe Ioanesi ne anu itema sou palomatana manina vile ane.” 27La ane'i miavuti la mikolinu Iesu aloxo 'o, “Nexi talavusou uasi.” Xe Iesu muavuti la muvikalane'i lexe, “Eni kalumo umomomo sou apala'alixu lexe 'ei ane mupelemasaxaleli sou a'oxo mii ano 'o uasi.”

Vaikala Latilovosi'a Itema Vile ta 'Olu ta Tamei

28Iesu musolonu vaivaikala noxou la muvikalane'i la aloxo 'o, “Ia ngingi ngexavutala a loxovaa? Lexe itema vile ta 'olu ta tamei, ia anu mulai la muvikalanu 'olu ane laposalaxu lexe, ‘'Alixeni maasi la nalai mo naxaxai no 'a xaisou uaini.’ 29La anu ukolinu lexe, ‘Eni amasaxa uasi.’ Ia ili'i la anu muxiunu xavutalau la, mulai sou muxaxai. 30Xe momu mulai la muvikalanu 'olu ane kokope no anu vaikala vilesisi aloxo ne. La anu muvikalanu momu lexe, ‘Ani mamilo eni alai.’ Ia ili'i la anu ulai ua. 31La sou 'ei noxi'a ilou mumulinu masaxa noxou momu?” Ane'i miavuti la mikolinu lexe, ‘Ane laposalaxu.’ Xe Iesu muavuti la muvikalane'i aloxo 'o, “Eni avikalangengi manina aloxo 'o, ta mitema sou itaxusou lamoli mo ta sema sou vote'i ne ane'i iulaxungengi sou i'unalai no anu saxisaxila'u noxou Lataua tei ia ngingi ngaili'i. 32 ^hAloxo ne, la sou Ioanesi itema sou u'ulosi'a ta mitema mune'e sou mulosiengixu vote'i sou 'ili'ilixo mulapu la ngingi ngamuxaxu tangengi noxou uasi. Ia ta mitema sou itaxusou lamoli ilo'a ta sema sou vote'isi mimuxaxu tane'i noxou. Mo ili'i no mine ngingi ngamaisou mimii ne la ngingi ngaxiunu opongengi mo ngamuxaxu tangengi noxou uasi.”

Vaikala Latilovosi'a ta Mitema Ane Isaxila'u Xaisou Uaini

33 ⁱMo Iesu muvikalane'i la lexe, “Ngalomusou vaikala latilovo vile la aloxo 'o. Itema vile mutounu xaisou uaini vile, xe mukalu la muvimelu sou. Xe mukalu la mutulusou lavalolo sou imuxaxu uaini ngiangiaxu la ikapikapinu no anu. Mo mumuxaxu latotope sou uaini lexaxu ulu'elai la utavo no anu. Mo mutulusou tani vile teitexi sou ta mitema ixolu no anu sou isaxila'u xai ne. Mu'oxonu aloxo ne, xe mukalu la, muitalonu xai ne no avo'a ta mitema se'i sou ane'i ixaxai no anu sou ulai la anu uno'u temanu se'i no anu ia anu mulutu sou mulai no tuala vile no paxa. 34Ioxe, no voxo ane xaisou ovu uaini ne temanu xe momoxosou i'elexu, la mupalusi'a ta mitema sou xaixai noxou milai noxi'a ta mitema e misaxila'u xai ne sou lexe ino'u na'u temanu se'i. 35Ane'i milutu xe milai mixali, la ta mitema e misaxila'u xai ne mitetelisi'a la mito'oto'omolu vile xe vile la mivau musoli avile xe mivau vile no lavo'o. 36La anu mupalusi'a ta mitema sou xaixai noxou se'i ane'i itiitisi'a tila noxi'a ane tei 'ole milai la. La ta mitema sou isaxila'u xai sou uaini ne mi'oxone'i aloxo ane tei ne la. 37Mi'oxone'i aloxo ne, la sou anu mupalusou 'olu mulai sou kaluxu sou. La muvikala lexe, ‘Male 'alixeni ulai la ane'i itoxonu.’ 38 ^jMulutu xe mulai muxali, xe ta mitema e ixaxai no xai ne mimaisou la mivikalane'i ngatongato'o lexe, ‘Itema ano 'o ne, anu ulai ili'i la ualasou utelo no anu momu mixumixu 'o ane. Ngane'e mo nenge'a tatetelisou mo tava'u usoli, mo sou ulai ili'i la nenge ualasinge utelo no anu.’ 39 ^kXe milutu vaxa la mivau musoli, ka mikasi vaxa noxou la mileanu muuatulai no anu vimeluxu xai ne. 40Ioxe tatananu xai ne mulavu lexe 'olu ane ta mitema ne mivau musoli ne, xe une'e la sou ngingi ngexavutala a loxovaa, mo u'oxonu mii ma'ia noxi'a ta mitema e misaxila'u xai ne?” 41La sou ane'i mikolinu lexe, “Anu uve'ave'a ta mitema ta masua ne isoisoli ukalusi, io sou anu u'italonu xai ne ulai noxi'a ta mitema sou xaixai se'i va'axu.” 42 ^lXe Iesu muavuti la mutali'isi'a lexe, “Loxovaa, ngingi ngeitisou vaivaikala se'i no anu Lavuku Tavuna teinu muvikala aloxo 'o?

‘Lavo'o e ta mitema sou itutulu tani misu'anu ne,
anu muxali lavo'o vile laixe manina sou utetelisou tani.
IAUE molusi mu'oxonu mii ane ne.
Nexi temaisou la laixe manina.’
43Vaikala latilovo ne laaxu aloxo 'o, Lataua uxexeenu saxisaxila'u noxou no avonge la ulosi'a ta mitema la'oluxa'a ane va'axu mo ixaxaisou la ixalixu temanu. 44Mo itema ane ulapau no latanu lavo'o ane ne la anu utuxusi xe 'ei ane lavo'o ne ulapau utelo no latanu la upelese avile.” 45No mine ta tatilasi'a ta aili'i ilo'a ta Palisaio milomusou vaikala Iesu mu'oxonu ne, la ane'i milavusousi lexe vaikala latilovo ne mumomomo noxi'a manina. 46Xe ane'i miavuti la sou mikamuli vote'i sou lexe itetelisou Iesu, ia imama'u noxi'a ta mitema xo ta mitema mixavutala lexe Anu itemasou palomatana ane.